XƏBƏRLƏR

Cüzi ödənişlər müqabilində böyük PULLAR - Vətəndaşlar diqqətli olmalıdır!

    Bu gün sosial şəbəkələrdə rəqəmsal valyuta bazarına az məbləğdə pul qoymaqla qısa müddətdə böyük pullar qazanmaq təklifi ilə bağlı tez-tez reklamlara rast gəlirik. Lakin burada şübhəli bir məqam odur ki, reklam tamamilə başqa mövzuda, xüsusən də vətənpərvərlik mövzusunda olur ("Azərbaycanlı qəhrəman öz ölkəsinə kömək etməklə həbsxanaya düşmək riski ilə üzləşib"), lakin reklama keçid edəndə söhbətin tamamilə başqa mövzudan getdiyini görürük. Digər tərəfdən isə bu reklamlar məşhur şəxslərin adından edilir ki, həmin insanların da bu cür reklama qoşulması inandırıcı görünmür.

    Milli.Az xəbər verir ki, məsələ ilə bağlı Trend-ə açıqlama verən Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov bildirib ki, bir sıra hallarda insanları şirnikləndirən və çox təəssüf ki, onları ziyana salan reklamlar yayımlanmaqdadır: "Belə hallar əvvəlki dövrlərdə də müşahidə olunurdu. Əvvəllər şəbəkə biznesinin bu tip şirnikləndirici reklamlarına rast gəlirdik - guya qısa zamanda varlanmaq və böyük məbləğdə gəlir əldə etmək. İndi isə kriptovalyuta bazarında gəlir əldə etməklə bağlı mütəmadi reklamlara rast gəlinir. Amma mən düşünürəm ki, birmənalı şəkildə vətəndaşlar ehtiyatlı və diqqətli olmalıdırlar. Bir sıra hallarda insanlardan cüzi ödənişlər tələb olunur, onun müqabilində isə böyük məbləğlər təklif edilir. Vətəndaş isə düşünür ki, tələb olunan məbləğ böyük deyil - 80-100 dollar. Təklif olunan məbləğ isə milyonlarla ifadə olunduğuna görə bütün hallarda vətəndaşlar şirnikərək buna razılıq verirlər.

   Burada ödənilən vəsaitlərin qaytarılması da mümkün deyil. Ona görə də insanların diqqətli olması və şirniklənərək qısa müddətdə böyük vəsaitə sahib olmaq istəyi ilə bu cür reklamların qurbanı olmamağa çalışmalıdırlar".

         Azərbaycan İnternet Forumunun prezidenti Osman Gündüz bildirib ki, sosial şəbəkələr açıq platformadır: "Yəni burada hər cür informasiya ola bilər. Düşünürəm ki, burada təbii ki, istifadəçinin də, dövlət qurumlarının da üzərinə müəyyən vəzifələr düşür.

       Birinci növbədə istifadəçi özü diqqətli olmalıdır. Burada cəlbedici elanlar olar bilər ki, "5 manat qoy, 10 manat götür". Yəni belə məsələlərdə gərək öncə istifadəçi özü diqqətli olsun. İstifadəçi həmin saytın nə qədər etibarlı, ciddi olmasını araşdırmalıdır. Birbaşa ödənişlər etməkdən, tələyə düşməkdən ehtiyatlanmalıdır".

Tarix : 17-07-20 02:02

Oxunma sayı: 300

Paylaş : (Bu xəbəri başqalarına önərə və onlarla bölüşə bilərsiniz)

Digər xəbərlər
Hamsını göstər


Davam etmək
İmtina etmək